अखेर शिंदे-फडणवीस सरकारचे पालकमंत्री जाहीर; गिरीश महाजन यांच्याकडे नांदेड पाठोपाठ लातूर, धुळे जिल्ह्याच्या पालकमंत्रपदाची जबाबदारी !

मुंबई |

सरकार स्थापनेपासुन दीड महिन्यांनी सरकारच्या मंत्रिमंडळाचा विस्तार झाला आणि विस्तारानंतर रखडलेली पालकमंत्र्यांची यादी अखेर शिंदे सरकारकडून जाहीर करण्यात आली आहे. यामध्ये देवेंद्र फडणवीस यांना तब्बल सहा जिल्ह्यांची जबाबदारी देण्यात आली आहे.

देवेंद्र फडणवीस पुण्याचे पालकमंत्री होणार अशी चर्चा होती पण पुण्याचे पालकमंत्रीपद चंद्रकांत पाटील यांच्याकडे असणार आहे. तर मुख्यमंत्री एकनाथ शिंदे यांच्या ठाण्याचे पालकमंत्री पद शंभुराज देसाई यांच्याकडे असणार आहे.नांदेडच्या पालकमंत्री पदी राज्याचे ग्रामविकास आणि पंचायती राज, वैद्यकीय शिक्षण, क्रीडा व युवक कल्याण मंत्री गिरीश महाजन यांच्यावर जबाबदारी सोपविण्यात आली आहे.

इतर पालकमंत्र्यांची नावे पुढीलप्रमाणे:

राधाकृष्ण विखे पाटील- अहमदनगर, सोलापूर,

सुधीर मुनगंटीवार-चंद्रपूर, गोंदिया,

चंद्रकांत दादा पाटील- पुणे,

विजयकुमार गावित- नंदुरबार,

गिरीश महाजन- धुळे, लातूर, नांदेड,

गुलाबराव पाटील – बुलढाणा,

दादा भुसे- नाशिक,

संजय राठोड- यवतमाळ, वाशिम,

सुरेश खाडे- सांगली,

संदिपान भुमरे -औरंगाबाद (छत्रपती संभाजीनगर)

उदय सामंत- रत्नागिरी, रायगड,

तानाजी सावंत-परभणी, उस्मानाबाद (धाराशिव)

रवींद्र चव्हाण- पालघर, सिंधुदुर्ग,

अब्दुल सत्तार- हिंगोली,

दीपक केसरकर -मुंबई शहर , कोल्हापूर,

अतुल सावे – जालना, बीड,

शंभूराज देसाई – सातारा, ठाणे,

मंगलप्रभात लोढा -मुंबई उपनगर

सध्या मंत्रिमंडळात 18 मंत्री असल्यामुळे एका मंत्र्याकडे दोन ते तीन जिल्ह्यांची जबाबदारी देण्यात आली आहे. तर फडणवीसांकडे 6 जिल्ह्यांचे पालकमंत्रीपद देण्यात आले आहे. पुढचा मंत्रिमंडळ विस्तार झाल्यानंतर पुन्हा एकदा पालकमंत्रीपदाचे वाटप केले जाणार आहे. त्यामुळे आगामी मंत्रिमंडळाकडे अनेकांचे लक्ष असणार आहे.

दरम्यान, सत्तेत येऊन तीन महिन्यांचा काळ उलटून गेल्यानंतरही पालकमंत्र्यांच्या नावांची घोषणा न झाल्याने विरोधकांनी शिंदे-फडणवीसांना घेरण्याचा वेळोवेळी प्रयत्न केला होता. त्यात यंदा पालकमंत्र्यांच्या ऐवजी स्वातंत्र्यदिनी अधिकाऱ्यांच्या हस्ते ध्वजवंदन करण्यात आले हेाते. त्यावरूनही विरोधकांनी सरकारवर निशाणा साधला होता. त्यानंतर आज अखेर यावर शिंदे सरकारने पालमंत्र्यांची नावे जाहीर करून हा तिढा सोडवला आहे.

जाहीर करण्यात आलेल्या पालमंत्र्यांच्या यादीत उपमुख्यमंत्री देवेंद्र फडणवीस यांच्याकडे 6 जिल्ह्यांची जबाबदारी देण्यात आली आहे. त्यानुसार त्यांच्याकडे नागपूर, वर्धा, अमरावती,अकोला, भंडारा, गडचिरोली या जिल्ह्याचे पालकमंत्री पदाची जबाबदारी असणार आहे.