हिमायतनगर तालुक्यातील विरसनी हद्दीतील पैनगंगा नदीतून अवैधरित्या रेतीची चोरी; विदर्भाचे पथक आल्याचे समजताच रेती माफियांनी ठोकली धूम

394

नांदेड –

हिमायतनगर भागातील काही रेती तस्करांनी पैनगंगा नदीतील लिलाव न झालेल्या विरसनी बंधाऱ्यापासून रेतीचोरीचा गोरखधंदा या भागातील तलाठी, मंडळ अधिकाऱ्याच्या संगनमताने सुरु केला आहे, असे असताना देखील हिमायतनगर भागातील अधिकारी स्वार्थापोटी कार्यवाही करण्यास तयार नसले तरी विदर्भातील महसूल पथक आल्याचे समजताच हिमायतनगर तालुक्यातील 5 ते 7 ट्रॅक्टर रेती माफियांनी धूम ठोकली आहे, अशी माहिती विदर्भातील एका अधिकाऱ्याने दिली. त्यामुळे पुन्हा एकदा हिमायतनगर महसूल अधिकाऱ्याच्या नाकर्तेपणाबाबत प्रश्नचिन्ह निर्माण केले जात आहे.

गेल्या अनेक वर्षापासून विदर्भ – मराठवाड्याच्या सीमेवरून वाहणाऱ्या पैनगंगा नदीवरून चोरीच्या मार्गाने राजकीय वरदहस्त असलेल्या हिमायतनगर तालुक्यातील नदीकाठावरील विविध गावच्या ट्रॅक्टर वाहनधारकांनी रेतीचोरीचा गोरखधंदा चालविला होता. याबाबत वर्तमानपत्रातून आवाज उठविल्यानंतर यंदा महसूल विभागाने रेती लिलावाचा अहवाल पाठविल्यानंतर जिल्हाधिकारी डॉ.विपीन यांच्या पुढाकाराने 5 रेतीघाटाचे लिलाव करण्यात आले आहेत तर अनेक रेती घाटाचे लिलाव झाले नसल्याने त्या घाटावरून राजकीय वरदहस्त असलेल्या वाळूमाफियांनी आपला रेती चोरीचा गोरखधंदा सुरु केला आहे. या प्रकारची माहिती संबंधित तहसीलदार, नायब तहसीलदार, मंडळ अधिकारी व तलाठ्यास असताना देखील केवळ खाबुगिरीची सवय जडल्यामुळे स्वार्थापोटी शासनाच्या महसुलावर दलालांना अभय देण्यात येत आहे.

तर ज्या ठिकाणी लिलाव झाले ते ठिकाण सोडून अन्य ठिकाणाहून रेतीचा उपास करून शासन व जनतेच्या डोळ्यात धूळफेक करण्याचा प्रकार गेल्या काही महिन्यापासून सुरु केला आहे. याबाबतची माहिती मिळाल्यानंतर विदर्भातील महसूल पथकाने हिमायतनगर हद्दीतील लिलाव न झालेल्या ठिकाणावर छापे मारून कार्यवाहीला सुरुवात केली मात्र हिमायतनगर तालुक्यातील महसुलाचे पथक कुंभकर्णी झोप घेऊन आपला स्वार्थ साधत असल्याचा आरोप हिमायतनगर तालुक्यातील पर्यावरण प्रेमी नागरिकांनी करून हिमायतनगर महसूल विभागाची पोलखोल केली आहे. काही दिवसापूर्वीच हिमायतनगर तालुक्यातील कामारी येथील एका वाहनावर कार्यवाही केल्याची माहिती उमरखेड महसूल प्रशासनाने दिली आहे.

आज दि.13 मे रोजी देखील दीघीसह काही रेती माफियांनी विल्सन येथील बंधाऱ्याच्या जवळून रेती उपास सुरु केला, याबाबतची माहिती मिळल्यानंतर उमरखेड विभागाचे तलाठी थोरवे यांनी सकाळी साडे आठ वाजता आपल्या पथकांसह या भागात रेती तस्करी होत असल्याचे समजल्यानंतर छापा टाकण्यासाठी नदीत दाखल झाले. मात्र हिमायतनगर तालुक्यातील 5 ते 7 ट्रॅक्टर वाहन घेऊन फरार झाले असल्याने कार्यवाही होऊ शकली नाही. मात्र यापुढे असे प्रकार आढळून असल्यास त्या रेती माफियांच्या मुसक्या आवळल्याशिवाय स्वस्थ बसणार नाही, अशी प्रतिक्रिया त्यांनी दिली तर तुमच्या हिमायतनगर भागातील महसुलाचे लोक या रेतीचोरावर कार्यवाही का करत नाहीत..? असा सवालही पथकातील काहींनी उपस्थित केला आहे.

Leave A Reply

Your email address will not be published.