आता तृतीयपंथीही दिसणार खाकी वर्दीत; मराठवाड्यातील नांदेडच्या पहिल्याच तृतीयपंथीयाचा पोलीस भरतीसाठी अर्ज

नांदेड –

राज्यात होणाऱ्या पोलीस भरतीत पहिल्याच तृतीयपंथीयाने भरतीचा अर्ज दाखल केला आहे. नांदेडच्या दिनेश शंकरराव हनवते याने हा अर्ज दाखल केला आहे. दिनेश हा उच्चशिक्षित असून त्याने समाजशास्त्र या विषयात एम.ए.केले आहे. तसेच गेल्या अनेक महिन्यांपासून तो स्पर्धा परीक्षेची तयारी देखील करत आहे. त्यामुळे तृतीयपंथीय आता खाकी वर्दीत दिसणार आहे.

महाराष्ट्र शासनाच्या नवीन धोरणानुसार समाजातील बहिष्कृत व उपेक्षित समजल्या जाणाऱ्या घटकाला म्हणजेच तृतीयपंथीयांना समाजाच्या मुख्य प्रवाहात आणण्यासाठी राज्य सरकारने पोलीस भरती प्रक्रियेत सामावून घेण्याचा निर्णय घेतला आहे. तृतीयपंथीयांना सामाजिक आरक्षण देण्याचा निर्णय राज्य सरकारने घेतला आहे. या निर्णयानंतर नांदेडच्या दिनेश हनवते या तृतीयपंथीयाने गुरुवारी शेवटच्या दिवशी पोलीस होण्याची इच्छा व्यक्त केली. दिनेश हा उच्चशिक्षित असून नांदेड शहरालगत असलेल्या पांगरी या गावाचा रहिवासी आहे. सध्या तो महाराष्ट्र लोकसेवा आयोगाच्या परीक्षांची तयारी करत आहे.

मात्र, तृतीयपंथाचे प्रमाणपत्र नसल्याने अर्ज भरण्याचे टाळले जात होते. अर्ज भरण्याची जिद्द असल्याने या प्रमाणपत्रासाठी शेवटचा दिवस असल्याने तृतीयपंथीयांसाठी काम करणाऱ्या नांदेडच्या कमल फाउंडेशनने त्याला फॉर्म भरण्यासाठी लागणाऱ्या सर्वच कागदपत्रांची पूर्तता केली. अखेर शेवटच्या दिवशी सायंकाळी त्याचा पोलीस भरतीसाठी अर्ज भरून घेतला. दिनेशचा मराठवाड्यातील पहिल्याच तृतीयपंथीचा पोलीस भरतीचा अर्ज असल्याचे त्यांच्याकडून सांगण्यात आले.

   दिनेशसोबत कमल फाउंडेशनचे अमरदिप गोधने

      दिनेशने मानले राज्य सरकारचे आभार..

महाराष्ट्र शासनाने तृतीयपंथासाठी घेतलेला हा निर्णय प्रेरणा देणारा निर्णय आहे. समाजामध्ये दोनच लिंग आहेत असे आपण समजतो. मात्र, तृतीयपंथी हे देखील समाजाचा एक घटक असून राज्य शासनाने सरकारी नोकऱ्यांमध्ये आम्हाला स्थान मिळवून दिले आहे, त्याबद्दल आम्ही राज्य शासनाचे आभार मानतो. समाजामध्ये आम्हाला देखील चांगली वागणूक मिळावी. आम्ही देखील समाजामध्ये चांगल्या पद्धतीने वागण्याचा प्रयत्न करतोय. महाराष्ट्र शासनाने आम्हाला जी काही संधी दिली आहे, त्या संधीच आम्ही नक्कीच सोनं करू, अशी प्रतिक्रिया दिनेशने दिली आहे.