देवगिरी एक्सप्रेसच्या वातानुकूलित कोचमधून धुराचे लोट, प्रवाशांची धावपळ; धर्माबाद रेल्वे स्थानकावरील घटना

नांदेड –

देवगिरी एक्सप्रेसच्या एसी कोचमधून अचानक धुराचे लोट निघाल्याची गंभीर घटना धर्माबाद रेल्वेस्थानकावर आज दि.20 सोमवारी सकाळी १०.३० वाजता घडली.यामुळे प्रवाशांची चांगलीच धावपळ उडाली.

नेहमी प्रमाणे मुंबई येथून निजामाबादकडे निघालेली देवगिरी एक्सप्रेस सोमवारी सकाळी १०.३० च्या सुमारास धर्माबाद रेल्वे स्थानकाजवळ येताच चालकाने ब्रेक लावले. परंतु, ब्रेक जोरात दाबल्या गेल्याने एका एसी कोचमधून धुराचे लोट सुरू झाले. यामुळे कोचमधील आणि स्थानकावरील प्रवाशांची एकच धावपळ उडाली. सदर घटना पाहताच रेल्वे तातडीने स्थानकावर थांबवुन कोचची तपासणी करण्यात आली. तेंव्हा चालकाने ब्रेक अचानक जोरात दाबल्याने कोचखालून धुर निघाला, असे कारण रेल्वेच्या वरिष्ठ अधिकाऱ्याने सांगून सदर प्रकरणाची चौकशी करण्यात येईल असे स्पष्ट केले.

या घटनेमुळे देवगिरी एक्सप्रेस काही वेळ स्थानकावर थांबवून पुन्हा सोडण्यात आली. दरम्यान, या रेल्वेचे नविन कोच असताना सुद्धा सदर प्रकार घडला आहे, यामुळे प्रवासी सुरक्षित आहेत का? असा सवाल उपस्थित होत असून रेल्वे प्रशासनाचा भोंगळ कारभार यानिमित्ताने चव्हाटयावर आला आहे.